ភ្នំពេញ៖ រដ្ឋលេខាធិការក្រសួងសង្គមកិច្ច និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានចូលរួមអបអរសាទរជូនចំពោះនាយកឧត្តមសេនីយ៍ ហ៊ុន ម៉ាណែត ដែលទទួលបានគោរមងារ «ទីប្រឹក្សាជាន់ខ្ពស់អង្គការពុទ្ធសាសនិកពិភពលោក»។
លោករដ្ឋលេខាធិការ ឯម ច័ន្ទមករា បានលើកឡើងថា ការផ្ដល់គោរមងារពីអង្គការពុទ្ធសាសនិកពិភពលោកបានបង្ហាញពីការទទួលស្គាល់លើស្នាដៃរបស់លោក ហ៊ុន ម៉ាណែត ដែលបានធ្វើកិច្ចការជាច្រើនកាលពីកន្លងទៅក្នុងការលើកកំពស់ពុទ្ធសាសនា សីលធម៌សង្គម សន្ដិភាព។ ជាងនេះទៀតសកម្មភាពរបស់លោក ហ៊ុន ម៉ាណែត ក្នុងការជួយសង្គ្រោះអាយុជីវិតរបស់ប្រជាពលពីជំងឺកូវីដ-១៩ និងជំងឺទូទៅផ្សេងទៀតតាមរយៈការដឹកនាំក្រុមគ្រូពេទ្យស្ម័គ្រចិត្តសម្ដេចតេជោ (TYDA)។
គួរឱ្យដឹងផងដែរ កាលពីព្រឹកថ្ងៃទី២ ខែឧសភានេះ អង្គការពុទ្ធសាសនិកពិភពលោក បានផ្ដល់គោរមងារជាទីប្រឹក្សាជាន់ខ្ពស់ដល់នាយឧត្តមសេនីយ៍ ហ៊ុន ម៉ាណែត បន្ទាប់ពីអង្គការនេះបានសង្កេតមើលសកម្មភាពជាច្រើនរបស់លោក ហ៊ុន ម៉ាណែត ក្នុងការដឹកនាំ ការជួយសង្គ្រោះ និងការអប់រំបែបព្រះពុទ្ធសាសនាដល់មហាជន។
ប្រធានអង្គការពុទ្ធសាសនិកពិភពលោកលោក ផាឡុប ថៃអារី បានថ្លែងក្នុងពិធីប្រគល់គោរមងានេះថា៖ «ការរួមចំណែកដ៏ថ្លៃថ្លាជាប្រយោជន៍សង្គមគួរឱ្យកត់សម្គាល់ទាំងអស់នេះគឺជាសក្ខីកម្មនៃទង្វើប្រកបដោយគុណធម៌របស់ឯកឧត្តមបណ្ឌិតដែលស្របនឹងពុទ្ធឱវាទនៃព្រះពុទ្ធអង្គគ្រូនៃយើង»៕